05 September, 2024 05:08:40 PM
സ്കൂൾ ഹോസ്റ്റലിൽ പെൺകുട്ടികളെ ലൈംഗികമായി പീഡിപ്പിച്ചു; ഡോക്ടർ അറസ്റ്റിൽ
തിരുച്ചിറപ്പള്ളി: സ്കൂൾ ഹോസ്റ്റലിൽ പ്രായപൂർത്തിയാകാത്ത കുട്ടികളെ ലൈംഗികമായി പീഡിപ്പിച്ച കേസിൽ ഡോക്ടർ അറസ്റ്റിൽ. തിരുച്ചിറപ്പള്ളിയിലെ സര്‍ക്കാര്‍ ഡോക്ടറായ സാംസണെ(31)യാണ് പോക്സോ കേസില്‍ പോലീസ് പിടികൂടിയത്. സര്‍ക്കാര്‍ – എയിഡഡ് സ്‌കൂളിൻ്റെ ഹോസ്‌റ്റലിലാണ് പെൺകുട്ടികളെ ഡോക്ടർ ലൈംഗിക പീഡനത്തിന് ഇരയാക്കിയത്. ഡോക്ടറുടെ അമ്മ ഇതേ സ്കൂളിലെ പ്രധാനാധ്യാപികയായിരിക്കെയാണ് സംഭവം.
തമിഴ്‌നാട് തിരുച്ചിറപ്പള്ളി ഫോർട്ട് ഓൾ വനിതാ പൊലീസാണ് പോക്സോ വകുപ്പുകൾ പ്രകാരം കേസെടുത്ത് പ്രതിയെ അറസ്‌റ്റ് ചെയ്തത്. കുറ്റകൃത്യങ്ങൾ മറച്ചുവയ്ക്കാൻ സഹായിച്ചെന്നാരോപിച്ച് പ്രതിയുടെ അമ്മയായ സ്കൂളിലെ പ്രധാനാധ്യാപികയെയും പൊലീസ് അറസ്‌റ്റ് ചെയ്‌തിട്ടുണ്ട്. ഇവരെ 3 ദിവസത്തെ ജുഡീഷ്യൽ കസ്റ്റഡിയിൽ വിട്ടു.
പീഡനത്തിനിരയായ പെൺകുട്ടികളിലൊരാൾ ഹെൽപ്പ് ലൈൻ നമ്പറിൽ വിളിച്ചറിയിച്ചതിനെ തുടർന്നാണ് ലൈംഗിക പീഡനത്തെ കുറിച്ച് പുറം ലോകം അറിയുന്നത്. തുടർന്ന് ജില്ലാ ശിശു സംരക്ഷണ സമിതി ഓഫിസറും മറ്റ് ഉദ്യോഗസ്ഥരും ചേർന്ന് പെൺകുട്ടികളുമായി സംസാരിച്ചു ഇതോടെ പ്രതിയായ ഡോക്ടർ മാസങ്ങളായി കുട്ടികളെ പീഡിപ്പിച്ചിരുന്നതായി വ്യക്‌തമാകുകയായിരുന്നു.
