13 December, 2024 08:41:45 PM
ഒന്നരപതിറ്റാണ്ടിന്‍റെ നിറവില്‍ ആവിഷ്കാര്‍ ഫോട്ടോ പ്രദര്‍ശനത്തിന് തൃശൂരില്‍ തുടക്കം
- പി.എം. മുകുന്ദന്‍
തൃശൂര്‍ : ഒന്നരപതിറ്റാണ്ടിന്‍റെ നിറവില്‍ ആവിഷ്കാര്‍ ഫോട്ടോപ്രദര്‍ശനത്തിന് തൃശൂരില്‍ തുടക്കം. കേരള ലളിത കലാ അക്കാഡമി ഹാളില്‍ ആവിഷ്കാറിന്‍റെ പതിനാറാമത് ചിത്ര പ്രദര്‍ശനം സിനിമാ നിരൂപകനും എഴുത്തുകാരനുമായ പ്രൊഫ.ഐ.ഷണ്‍മുഖദാസ് ഉദ്ഘാടനം ചെയ്തു. ഒരാഴ്ച നീളുന്ന പ്രദര്‍ശനം 18ന് അവസാനിക്കും. 2006 ലായിരുന്നു ആവിഷ്കാറിന്‍റെ ആദ്യ ഫോട്ടോപ്രദര്‍ശനം.
രാജന്‍ കുറ്റൂര്‍, രാജേഷ് നാട്ടിക, മുഹമ്മദ് സാഫി, അരവിന്ദന്‍ മണലി, പ്രദീപ് കുന്നമ്പത്ത് എന്നിവരുടെ പ്രശസ്തമായ അഞ്ച് ചിത്രങ്ങള്‍ സഹിതം ഏറ്റവും പുതിയ 25 ഫോട്ടോകളുടെ പ്രദര്‍ശനമാണ് നടക്കുന്നത്. കലാപരമായി ഏറെ മികവ് പുലര്‍ത്തുന്നതും ഫൈന്‍ ആര്‍ട്ട് ഫോട്ടോഗ്രാഫി വിഭാഗത്തില്‍പെടുന്നതുമാണ് എല്ലാ ചിത്രങ്ങളും. ചിത്രികരണ രീതിയും അവ പകര്‍ത്തിയ സ്ഥലത്തെകുറിച്ചും മറ്റ് സാങ്കേതികവശങ്ങളെകുറിച്ചുമെല്ലാം ഫോട്ടോഗ്രാഫര്‍മാര്‍ തങ്ങളുടെ ചിത്രങ്ങളുെട ആസ്വാദകര്‍ക്ക് വിവരിച്ചുകൊടുക്കുന്നതും പ്രദര്‍ശനത്തിന്‍റെ മറ്റൊരു സവിശേഷതയാണ്.
