31 August, 2024 12:06:16 PM
ആകാശത്തുവെച്ച് ടോവിങ് റോപ്പ് പൊട്ടി, എയർ ലിഫ്റ്റിങ്ങിനിടെ ഹെലികോപ്റ്റർ താഴെവീണ് തകർന്നു
ദെഹ്റാദൂൺ: തകരാറിലായ ഹെലികോപ്റ്റർ എയർലിഫ്റ്റ് ചെയ്ത് കൊണ്ടുപോകുന്നതിനിടെ ടോവിങ് റോപ്പ് പൊട്ടി താഴെ വീണ് തകർന്നു. കേദാർനാഥ് ക്ഷേത്രത്തിലേക്ക് തീർത്ഥാടകരെ കൊണ്ടുപോകുന്നതിന് നേരത്തേ ഉപയോഗിച്ചിരുന്ന ഹെലികോപ്റ്ററാണ് ഇപ്പോൾ അപകടത്തിൽപ്പെട്ടത്.
കേദാർനാഥിലെ ഹെലിപാഡിൽനിന്ന് ഗൗച്ചറിലേക്ക് മറ്റൊരു ഹെലികോപ്റ്റർ ഉപയോഗിച്ച് പ്രത്യേക കയർകൊണ്ട് (ടോവിങ് റോപ്പ്) ബന്ധിപ്പിച്ചായിരുന്നു തകരാറിലായ കോപ്റ്റർ കൊണ്ടുപോയത്. എന്നാൽ ആകാശത്തുവച്ച് ഈ കയർ പെട്ടെന്ന് പൊട്ടിയതോടെ ഹെലികോപ്റ്റർ താഴേക്കുവീഴുകയായിരുന്നു.
ലിഞ്ചോളിയിലെ മന്ദാകിനി നദിക്ക് സമീപമാണ് സ്വകാര്യ കമ്പനിയുടെ കോപ്റ്റർ തകർന്നുവീണത്. അതേസമയം അപകടത്തിന്റെ ദൃശ്യങ്ങളും പുറത്തുവന്നു. നിലവിൽ ആർക്കും പരിക്കില്ലെന്നാണ് അധികൃതർ നൽകുന്ന വിവരം.
