24 October, 2024 12:05:51 PM
കൊല്ലത്ത് ഡോക്ടറെയും ജീവനക്കാരെയും ആക്രമിച്ച സംഭവം; 3 പേര്‍ അറസ്റ്റില്‍
കൊല്ലം: കൊല്ലത്ത് പാരിപ്പള്ളി മെഡിക്കല്‍ കോളേജില്‍ അതിക്രമം. ഡോക്ടറെയും ജീവനക്കാരെയും ആക്രമിച്ചു. സംഭവത്തില്‍ മൂന്ന് പേര്‍ പിടിയില്‍. കൊല്ലം ചടയമംഗലം പോരേടം സ്വദേശികളായ നൗഫല്‍ , മുഹമ്മദ്, നൗഷാദ് എന്നിവരാണ് പിടിയിലായത്. തിങ്കളാഴ്ച രാത്രി 10 മണിയോടെയാണ് പ്രതികള്‍ ആശുപത്രി അത്യാഹിത വിഭാഗത്തില്‍ ഡ്യൂട്ടിയിലുണ്ടായിരുന്ന ഡോക്ടറെയും മറ്റ് ജീവനക്കാരെയും മര്‍ദിച്ചത്.
ഒരു അപകടത്തില്‍ പരിക്കേറ്റ ആളെയും കൊണ്ടാണ് മൂന്ന് യുവാക്കള്‍ തിങ്കളാഴ്ച രാത്രി പാരിപ്പള്ളി സര്‍ക്കാര്‍ മെഡിക്കല്‍ കോളേജ് ആശുപത്രിയിലെ അത്യാഹിത വിഭാഗത്തില്‍ എത്തിയത്. ചികിത്സ വൈകുന്നതായി ആരോപിച്ച് ഡ്യൂട്ടി ഡോക്ടറുമായി ഇവര്‍ വാക്കു തര്‍ക്കമുണ്ടായി. തുടര്‍ന്ന് ഡോക്ടറെയും ആശുപത്രിയിലെ മറ്റ് ജീവനക്കാരെയും യുവാക്കള്‍ കൈയ്യേറ്റം ചെയ്‌തെന്നാണ് കേസ്. ആശുപത്രിയില്‍ രാത്രി സുരക്ഷാ ഡ്യൂട്ടിയില്‍ ഉണ്ടായിരുന്ന പൊലീസുകാരനെയും പ്രതികള്‍ ആക്രമിച്ചെന്ന് പാരിപ്പള്ളി പൊലീസ് പറയുന്നു. സംഭവത്തെ തുടര്‍ന്ന് ഡോക്ടറുടെ പരാതി പ്രകാരം പൊലീസ് കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ കഴിഞ്ഞ ദിവസം മൂന്ന് പ്രതികളും അറസ്റ്റിലാവുകയായിരുന്നു.
