30 October, 2024 09:37:49 AM
സ്ത്രീ ശക്തി ലോട്ടറിയുടെ ഒന്നാം സമ്മാന ജേതാവ് വാഹനാപകടത്തിൽ മരിച്ചു
കൊച്ചി: മൂന്ന് മാസം മുമ്പ് സ്ത്രീശക്തി ലോട്ടറിയുടെ ഒന്നാം സമ്മാന ജേതാവായിരുന്നയാൾ വാഹനാപകടത്തിൽ മരിച്ചു. കോലഞ്ചേരി കടയിരുപ്പ് ഏഴിപ്രം മനയത്ത് വീട്ടിൽ എം സി യാക്കോബാണ് മരിച്ചത്. 75 വയസ്സായിരുന്നു.
കോലഞ്ചേരി പെരുമ്പാവൂർ റോഡിൽ ഇരുചക്രവാഹനങ്ങൾ തമ്മിൽ കൂട്ടിയിടിച്ചുണ്ടായ അപകടത്തിൽപ്പെട്ട് ചികിത്സയിലായിരുന്നു ഇയാൾ. കോലഞ്ചേരിക്കടുത്ത് മൂശാരിപ്പടിയിലാണ് തിങ്കളാഴ്ച വൈകീട്ട് അപകടമുണ്ടായത്. വൈകീട്ട് ആറോടെ മൂശാരിപ്പടി ഭാഗത്തുനിന്നും വരുകയായിരുന്ന യാക്കോബ്, കടയിലേക്ക് തിരിയുന്നതിനിടെ എതിരെ വന്ന ബൈക്കുമായി കൂട്ടിയിടിച്ചായിരുന്നു അപകടം.
അപകടത്തിൽ ഗുരുതരമായി പരിക്കേറ്റ യാക്കോബിനെ കോലഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ചൊവ്വാഴ്ച വൈകീട്ട് അഞ്ചുമണിയോടെ മരിച്ചു. പുതുപ്പനത്ത് യൂസ്ഡ് കാർ ഷോറൂമിലെ ജീവനക്കാരനായിരുന്നു. എഴുപത്തിയഞ്ച് ലക്ഷം രൂപയായ സമ്മാനത്തുക മൂന്നാഴ്ച മുൻപാണ് യാക്കോബ് കൈപ്പറ്റിയത്.
