06 November, 2024 07:55:49 PM
കോട്ടക്കലിൽ മദ്യലഹരിയിൽ വാഹനം ഓടിച്ച ഡ്രൈവർ അറസ്റ്റിൽ
കോട്ടക്കൽ: മദ്യലഹരിയിൽ അശ്രദ്ധമായി വാഹനം ഓടിച്ച ഡ്രൈവറെ അറസ്റ്റ് ചെയ്തു. കോഴിക്കോട് കുരുവട്ടൂർ തെരുവത്ത്താഴം താഴത്ത് വീട്ടിൽ റിദേഷിനെ (36)യാണ് കോട്ടക്കൽ പൊലീസ് അറസ്റ്റ് ചെയ്തത്. ബലിതർപ്പണ ചടങ്ങുകൾക്കായി കുടുംബം സഞ്ചരിച്ചിരുന്ന വാഹനമാണ് ഇയാൾ ഓടിച്ചിരുന്നത്. കോഴിക്കോട്ടുനിന്നാണ് തിരുനാവായ നാവാമുകുന്ദ ക്ഷേത്രത്തിലേക്ക് ബലിതർപ്പണത്തിനായി കുടുംബം സഞ്ചരിച്ചത്.
ഡ്രൈവറുടെ പെരുമാറ്റത്തിൽ സംശയം തോന്നിയ യാത്രക്കാർ പൊലീസിൽ അറിയിക്കുകയായിരുന്നു. തുടർന് ദേശീയപാത ചങ്കുവെട്ടി ജങ്ഷനിൽ വെച്ച് കോട്ടക്കൽ പൊലീസ് വാഹനം കസ്റ്റഡിയിലെടുത്തു. വൈദ്യപരിശോധനയിൽ ഡ്രൈവർ മദ്യപിച്ചെന്ന് തെളിഞ്ഞതോടെ അറസ്റ്റ് രേഖപ്പെടുത്തി. ഇയാൾക്ക് പിന്നീട് ജാമ്യം നൽകി. പിന്നീട് മറ്റൊരു വാഹനത്തിലാണ് സ്ത്രീകളടക്കമുള്ള ഇരുപതംഗ കുടുംബം യാത്ര തുടർന്നത്.
