25 September, 2024 01:04:02 PM
ചെളി തെറിപ്പിച്ചെന്നാരോപിച്ച് ബസിനും ഡ്രൈവർക്കും നേരെ യുവാവിന്‍റെ അതിക്രമം
ആലപ്പുഴ: ആലപ്പുഴ എരമല്ലൂരില്‍ സ്വകാര്യ ബസ് ചെളി തെറിപ്പിച്ചുവെന്ന് ആരോപിച്ച് ബൈക്ക് യാത്രികന്റെ അതിക്രമം. ബസ് ഡ്രൈവറുടെ തലയിൽ പെട്രോളൊഴിക്കുകയും ബസിൻ്റെ ചില്ലുകൾ അടിച്ചു തകർക്കുകയും ചെയ്തു. ഇതു കണ്ട യാത്രക്കാർ പരിഭ്രാന്തരായി അലമുറയിടുകയായിരുന്നു.
സ്വകാര്യ ബസ് ഡ്രൈവര്‍ മാത്യൂവിനെ ആശുപത്രിയില്‍ പ്രവേശിപ്പിച്ചു. പ്രതിയെ പൊലീസ് കസ്റ്റഡിയില്‍ എടുത്തിട്ടുണ്ട്. രാവിലെ 9 മണിയോടെയാണ് സംഭവം. എറണാകുളം ഭാഗത്ത് നിന്നും ചേര്‍ത്തലയിലേക്ക് വരുന്ന 'മലയാളീസ്' എന്ന ബസിന് നേരെയാണ് ആക്രമണം ഉണ്ടായത്.
യാത്രക്കിടെ ചെളി തെറിപ്പിച്ചെന്നാരോപിച്ച് ഇരുചക്ര വാഹനത്തില്‍ വരികയായിരുന്ന യുവാവ് എരമല്ലൂരില്‍ വെച്ച് ബസ് തടയുകയായിരുന്നു. ഡ്രൈവര്‍ ഇറങ്ങിവന്നപ്പോഴാണ് കയ്യില്‍ കരുതിയിരുന്ന പെട്രോള്‍ യുവാവ് ഡ്രൈവറുടെ തലയിലേക്ക് ഒഴിച്ചത്.
