29 October, 2024 02:02:58 PM
പട്‌നയില്‍ മെട്രോ നിര്‍മാണത്തിനിടെ അപകടം: മൂന്ന് മരണം
പട്ന: പട്ന മെട്രോ നിര്‍മാണ സ്ഥലത്ത് രാത്രി ഷിഫ്റ്റിങ്ങിനിടെയുണ്ടായ അപകടത്തില്‍ ലോക്കോമോട്ടീവ് ഓപ്പറേറ്റര്‍ ഉള്‍പ്പെടെ മൂന്നു തൊഴിലാളികള്‍ മരിച്ചു. ഒഡിഷ സ്വദേശികളായ മനോജ്, വിജയ്, ശ്യാം ബാബു എന്നിവരാണ് മരിച്ചത്. പട്‌നയിലെ അശോക് രാജ്പഥില്‍ എന്‍ഐടി എക്സിറ്റിന് സമീപമുള്ള മെട്രോ നിര്‍മാണ സ്ഥലത്താണ് അപകടമുണ്ടായത്.
അപകടത്തില്‍ എട്ട് പേര്‍ക്ക് പരുക്കേല്‍ക്കുകയും ചെയ്തു. പരുക്കേറ്റവര്‍ പട്ന മെഡിക്കല്‍ കോളജ് ആശുപത്രിയില്‍ ചികിത്സയിലാണ്. എന്നാല്‍, അപകടത്തില്‍ രണ്ട് തൊഴിലാളികള്‍ മാത്രമാണ് മരിച്ചതെന്നാണ് പട്ന ജില്ലാ മജിസ്ട്രേറ്റ് ചന്ദ്രശേഖര്‍ സിങ് പറഞ്ഞത്.
ലോഡുചെയ്ത ലോക്കോമോട്ടീവ് പിക്കപ്പിന്റെ ബ്രേക്ക് തകരാറിലായതിനെത്തുടര്‍ന്ന് നിയന്ത്രണം വിട്ട് തൊഴിലാളികളുടെ മുകളിലൂടെ കയറുകയായിരുന്നു. 25 ഓളം തൊഴിലാളികളാണ് അപകട സ്ഥലത്തുണ്ടായിരുന്നത്. രാത്രി ഷിഫ്റ്റില്‍ സൂപ്പര്‍വൈസര്‍മാര്‍ ഇല്ലാത്തതിനാല്‍ മുമ്പ് തൊഴിലാളികള്‍ ആശങ്ക അറിയിച്ചിരുന്നു.
