09 March, 2024 12:53:32 PM
സിദ്ധാർഥന്‍റെ മരണം സിബിഐയ്ക്ക് വിട്ടു; കുടുംബം മുഖ്യമന്ത്രിയെ കണ്ടതിനു പിന്നാലെ ഉത്തരവിറക്കി
തിരുവനന്തപുരം: പൂക്കോട് വെറ്ററിനറി കോളജിലെ വിദ്യാർഥി ജെ.എസ്.സിദ്ധാർഥന്‍റെ മരണത്തിൽ കേസ് അന്വേഷണം സിബിഐയ്ക്കു വിട്ടു. ഇതുസംബന്ധിച്ച് സർക്കാർ ഉത്തരവ് പുറത്തിറക്കി. കുടുംബത്തിന്‍റെ ആവശ്യപ്രകാരമാണ് നടപടി.
കേസ് അന്വേഷണം സിബിഐക്ക് വിടാൻ തീരുമാനിച്ചതായി മുഖ്യമന്ത്രി സിദ്ധാർഥന്‍റെ കുടുംബത്തെ അറിയിച്ചു. സിദ്ധാർഥന്‍റെ പിതാവും ബന്ധുക്കളും ഇന്ന് ഓഫീസിലെത്തി മുഖ്യമന്ത്രിയെ കണ്ടിരുന്നു. കേസ് അന്വേഷണം സിബിഐക്ക് വിടണമെന്ന് ആവശ്യപ്പെട്ട് സിദ്ധാർഥന്‍റെ അമ്മ മുഖ്യമന്ത്രിക്ക് നിവേദനം നൽകുകയും ചെയ്തിരുന്നു.
