27 July, 2024 07:59:02 PM
അശ്ലീല ചിത്രം കണ്ട് സഹോദരിയെ ബലാത്സംഗം ചെയ്ത് കൊന്നു; സഹായത്തിന് അമ്മയും സഹോദരിമാരും
ഭോപ്പാല്‍: ഒമ്പത് വയസുകാരിയായ സഹോദരിയെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ 13കാരനും അമ്മയ്ക്കും സഹോദരങ്ങൾക്കുമെതിരെ കേസ്. അശ്ലീല ചിത്രം കണ്ട് അതിന് അടിമയായെന്നാണ് റിപോർട്ടുകൾ പറയുന്നത്. ഏപ്രിൽ 24 നാണ് മധ്യപ്രദേശിലെ രേവയിൽ കേസിനാസ്പദമായ സംഭവം നടന്നത്. ഫോണിൽ അശ്ലീല ചിത്രം കണ്ട 13കാരൻ സഹോദരിയെ ബലാത്സംഗം ചെയ്യുകയും പിന്നാലെ കൊലപ്പെടുത്തുകയുമായിരുന്നു എന്നാണ് റിപോർട്ടുകൾ. എന്നാൽ കുറ്റകൃത്യം മറച്ചുവെക്കാൻ അമ്മയും രണ്ട് സഹോദരിമാരും സഹായിച്ചതായാണ് റിപ്പോർട്ട്.
ഒമ്പതുകാരിയുടെ മൃതദേഹം കണ്ടെത്തിയത് വീടിന്റെ പരിസരത്തുനിന്നാണ്. മരണം കൊലപാതകമാണെന്നും ബലാത്സംഗത്തിന് വിധേയയായെന്നുമുള്ള പോസ്റ്റ്‌മോർട്ടം റിപ്പോർട്ടാണ് കേസിൽ നിർണായകമായത്. പെൺകുട്ടിയെ ബലാത്സംഗം ചെയ്ത ശേഷം സഹോദരൻ തന്നെ കഴുത്തു ഞെരിച്ച് കൊലപ്പെടുത്തുകയായിരുന്നുവെന്നാണ് പൊലീസിന്റെ വിശദീകരണം. കേസ് വഴിതിരിച്ചുവിടാൻ സഹോദരിമാരും അമ്മയും ശ്രമിച്ചതായും പൊലീസ് അറിയിച്ചു. എന്നാൽ ഇവരെ തുടർച്ചയായി ചോദ്യം ചെയ്തതിനു പിന്നാലെയാണ് പൊലീസിന് നിർണായക വിവരം ലഭിച്ചത്.
അതേസമയസം ലൈംഗികാതിക്രമത്തെ കുറിച്ച് അച്ഛനോട് പറയുമെന്ന് പറഞ്ഞതോടെ സഹോദരൻ കുട്ടിയെ ശ്വാസം മുട്ടിച്ച് കൊലപ്പെടുത്താൻ ശ്രമിക്കുകയായിരുന്നു. പിന്നാലെ അമ്മയെ വിവരമറിയിച്ചു. കുട്ടി മരിച്ചില്ലെന്ന് അറിഞ്ഞതോടെ അമ്മയുടെ സഹായത്തോടെ വീണ്ടും കഴുത്തുഞെരിച്ച് മരണം ഉറപ്പാക്കുകയായിരുന്നു. തുടർന്ന് സഹോദരിമാർകൂടി ചേർന്ന് തെളിവുകൾ നശിപ്പിച്ചെന്നുമാണ് പൊലീസ് റിപ്പോർട്ട്.കേസുമായി ബന്ധപ്പെട്ട് അമ്പത് പേരെയാണ് പൊലീസ് ചോദ്യം ചെയ്തത്. മൊഴിയിൽ വൈരുദ്ധ്യം തോന്നിയതോടെ വിശദമായി ചോദ്യം ചെയ്തപ്പോഴാണ് പ്രതികൾ കുറ്റസമ്മതം നടത്തിയത് എന്നും പൊലീസ് വ്യക്തമാക്കുന്നുണ്ട്. ഇതിനുപിന്നാലെയാണ് പ്രതികളെ കസ്റ്റഡിയിലെടുത്തത്.
