23 September, 2024 01:12:15 PM
ബെവ്‌കോയില്‍ നിന്ന് മദ്യക്കുപ്പിയുമായി ഇറങ്ങിയോടി; പോലീസുകാരന്‍ പിടിയില്‍
കൊച്ചി: ബെവ്കോ ഔട്ട്ലെറ്റിൽനിന്ന് പണം നൽകാതെ മദ്യക്കുപ്പിയുമായി കടക്കാൻ ശ്രമിച്ച പോലീസുകാരൻ പിടിയിൽ. കളമശ്ശേരി എ.ആർ. ക്യാമ്പിലെ പോലീസ് ഡ്രൈവർ കെ.കെ. ഗോപിയാണ് പോലീസ് പിടിയിലായത്. ഗോപി മദ്യവുമായി കടക്കാൻ ശ്രമിക്കുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്.
പട്ടിമറ്റം ബെവ്കോ ഔട്ട്ലെറ്റിൽ ഇന്നലെ രാവിലെയാണ് സംഭവം. മദ്യം വാങ്ങിയ ശേഷം ഗോപിയും ജീവനക്കാരുമായി വാക്കുതർക്കമുണ്ടായി. വനിതാ ജീവനക്കാരിയെ അസഭ്യം പറഞ്ഞതായും പരാതിയുണ്ട്. തർക്കത്തിനിടെ ഇയാൾ പണം നൽകാതെ മദ്യക്കുപ്പിയുമായി കടക്കാൻ ശ്രമിച്ചു. ഇതിനിടെ ബെവ്കോ ഔട്ട്ലെറ്റിന്റെ വാതിലും തകർത്തു. വനിതാ ജീവനക്കാർ ഉൾപ്പെടെ ചേർന്ന് ബലംപ്രയോഗിച്ച് ഗോപിയെ തടഞ്ഞുവെക്കുകയായിരുന്നു.
സംഭവത്തിൽ ബെവ്കോ ജീവനക്കാരുടെ പരാതിയിൽ കുന്നത്തുനാട് പോലീസ് കേസെടുത്തു. ഗോപിയെ വീട്ടിലെത്തി കസ്റ്റഡിയിലെടുക്കുകയും ചെയ്തു. ഇയാളുടെ അ‌റസ്റ്റ് രേഖപ്പെടുത്തിയെന്നും തിങ്കളാഴ്ച കോടതിയിൽ ഹാജരാക്കി റിമാൻഡ് ചെയ്യുമെന്നും പോലീസ് അ‌റിയിച്ചു. പൊതുമുതൽ നശിപ്പിക്കൽ, സ്ത്രീത്വത്തെ അ‌പമാനിക്കൽ ഉൾപ്പെടെയുള്ള വകുപ്പുകൾ പ്രതിയ്ക്കെതിരേ ചുമത്തിയിട്ടുണ്ട്.
