06 November, 2024 09:25:40 AM
പെരുമ്പാവൂരിൽ അപകടാവസ്ഥയിൽ ഓടിച്ച കാർ ബൈക്ക് യാത്രികനെയും വൈദ്യുതി പോസ്റ്റും ഇടിച്ചു തെറിപ്പിച്ചു
പെരുമ്പാവൂർ: പൊങ്ങാശ്ശേരി റോഡിൽ കിലോമീറ്ററുകളോളം അപകടാവസ്ഥയിൽ ഓടിച്ചു വന്ന കാർ വളയൻചിറങ്ങരയിൽ
ബൈക്ക് യാത്രക്കാരനെയും റോഡരികിലെ വൈദ്യുതി പോസ്റ്റും ഇടിച്ചു തെറിപ്പിച്ചു. ഇന്നലെ ഉച്ചക്ക് 1.45 ഓടെയുണ്ടായ അപകടത്തിൽ കാർ യാത്രികനായ റെക്സ് ജോ സോമൻ (22) എന്നയാൾക്ക് പരിക്കേറ്റതായി പോലീസ് പറഞ്ഞു. സംഭവത്തിൽ ഇന്നലെ രാത്രി ഏറെ വൈകിയാണ്
പെരുമ്പാവൂർ കുറുപ്പുംപടി പോലീസ് കേസെടുത്തത്.
അതേസമയം കാർ ഓടിച്ചിരുന്നത് കോട്ടയം തെളളകം കാരിത്താസ് ആശുപത്രിയിലെ അസിസ്റ്റന്റ് ജോയിന്റ് ഡയറക്ടർ ഫാ. ജോയ്സ് നന്ദികുന്നേലാണെന്നും ഇദ്ദേഹം മദ്യപിച്ചിരുന്നുമെന്നുള്ള വാർത്തകൾ സമൂഹമാധ്യമങ്ങളിൽ വൈറലായി. അപകടകരമായ രീതിയിൽ ഓടിച്ച കാറിനെ പിന്തുടർന്ന മറ്റൊരു വാഹനത്തിലെ യാത്രക്കാർ പകർത്തിയ ദൃശ്യങ്ങൾ സഹിതമാണ് വാർത്ത പ്രചരിക്കുന്നത്. കാറിനുള്ളിൽ നിന്നും കിട്ടിയ വിദേശ മദ്യകുപ്പികളുടെ ദൃശ്യങ്ങളും സമൂഹമാധ്യമങ്ങളിൽ പ്രചരിക്കുന്നുണ്ട്.
എന്നാൽ ഇത് ഒരു സാധാരണ റോഡ് അപകടമായിട്ടാണ് പെരുമ്പാവൂർ കുറുപ്പംപടി പോലീസ് കേസെടുത്തിരിക്കുന്നത്. അപകടസമയത്ത് എത്ര പേർ കാറിനുള്ളിൽ ഉണ്ടായിരുന്നുവെന്നതും വൈദികന്റെ പങ്കും അന്വേഷിച്ചുവരികയാണെന്ന് പോലീസ് പറഞ്ഞു.
