14 November, 2024 09:20:19 AM
പീരുമേട്ടിൽ കാട്ടാന പാഞ്ഞടുത്തു; സ്‌കൂൾ വിദ്യാർഥികൾ രക്ഷപ്പെട്ടത് തലനാരിഴയ്ക്ക്
ഇടുക്കി: പീരുമേട്ടിൽ സ്‌കൂൾ വിദ്യാർഥികൾക്ക് നേരെ കാട്ടാന പാഞ്ഞടുത്തു. ഇരുപതോളം കുട്ടികൾ നിൽക്കുകയായിരുന്ന ബസ് സ്റ്റോപ്പ് പരിസരത്തേക്കാണ് കാട്ടാന ഭീതിവിതച്ചുകൊണ്ട് പാഞ്ഞടുത്തത്. സംഭവത്തിന്റെ വീഡിയോ പുറത്തുവന്നിട്ടുണ്ട്.
മര്യാഗിരി സ്കൂളിലെ വിദ്യാർഥികളെയാണ് കാട്ടാന ഓടിച്ചത്. അത്ഭുതകരമായാണ് വിദ്യാർഥികൾ കാട്ടാനയിൽ നിന്ന് രക്ഷപ്പെട്ടത്. കാട്ടാന വരുന്നതുകണ്ട കുട്ടികൾ പല വഴിക്ക് ഓടി രക്ഷപ്പെടുകയായിരുന്നു. ഒരു വിദ്യാർഥിയുടെ അടുത്തേക്ക് വരെ കാട്ടാന പാഞ്ഞടുത്തു. എന്നാൽ മറ്റൊരു വഴിയിലേക്ക് ഓടിപ്പോകുകയായിരുന്നു. നാട്ടുകാരും വൈദികരും ബഹളം വെച്ചാണ് പിന്നീട് കാട്ടാനയെ തുരത്തിയത്.
