21 December, 2023 10:02:48 AM
തിരക്ക്: ശബരിമലയിൽ മണ്ഡലപൂജ വരെ വെർച്ച്വൽ ക്യൂ ബുക്കിംഗ് നിർത്തി
പത്തനംതിട്ട: ശബരിമലയിൽ മണ്ഡലപൂജ വരെ വെർച്ച്വൽ ക്യൂ ബുക്കിംഗ് നിർത്തി. ബുക്കിംഗ് 80,000ത്തിൽ നിലനിർത്താൻ ഹൈക്കോടതി നിർദ്ദേശം ഉണ്ട്. വരുന്ന ഒരാഴ്ച ശരാശരി ബുക്കിംഗ് 80,000ത്തിന് മുകളിലാണ്. തിരക്ക് പരിഗണിച്ചാണ് തീരുമാനമെന്ന് ദേവസ്വം അഡ്മിനിസ്ട്രേറ്റീവ് ഓഫീസറും വെർച്ചൽ ക്യൂ സ്പെഷ്യൽ ഓഫീസറുമായ ഒ ജി ബിജു പറഞ്ഞു.
ബുക്കിംഗ് നിയന്ത്രിക്കും മുൻപേ പല ദിവസത്തേയും 80,000 കടന്നിരുന്നു. 80,000ത്തിന് മുകളിൽ ബുക്കിംഗ് അനുവദിക്കരുതെന്ന് പൊലീസും ആവശ്യപ്പെട്ടിട്ടുണ്ട്. ഈ മാസം 27 വരെയൂളള പരമാവധി അനുവദിക്കാവുന്ന സ്ലോട്ടുകൾ പൂർണമായിരിക്കുകയാണ്. 27 നാണ് മണ്ഡല പൂജ. 26ന് വൈകുന്നേരം ആറന്മുളയിൽ നിന്നുള്ള തങ്കയങ്കി ഘോഷയാത്ര ശബരിമലയിൽ എത്തിച്ചേരും.
