25 January, 2025 11:25:57 AM
ആവണംകോട് സരസ്വതി ക്ഷേത്രത്തിൽ ഫെബ്രുവരി 2 ന് വസന്ത പഞ്ചമി
കൊച്ചി: ആദി ശങ്കരാചാര്യ സ്വാമികൾ ഹരിശ്രീ കുറിച്ച നെടുമ്പാശ്ശേരി ആവണംകോട് സ്വയംഭൂ സരസ്വതി ക്ഷേത്രത്തിൽ ഫെബ്രുവരി 2 ന് (മകരം 20) വസന്ത പഞ്ചമി ആഘോഷം നടക്കുന്നു. മാഘ മാസത്തിലെ വെളുത്ത പക്ഷത്തിലെ അഞ്ചാംനാൾ പഞ്ചമിയാണ് വസന്ത പഞ്ചമിയായി ആഘോഷിക്കുന്നത്. വിദ്യാദേവതയായ സരസ്വതീദേവിയെ ഭാരതം മുഴുവൻ പൂജിക്കുന്ന ദിവസമായ വസന്ത പഞ്ചമി അറിവിന്റെയും കലയുടെയും സംഗീതത്തിന്റെയും ദേവിയായ സരസ്വതിദേവിയുടെ പിറന്നാളു കൂടിയാണ്. കേരളത്തിൽ പുരാതനമായ ആവണംകോട് സരസ്വതി ക്ഷേത്രത്തിൽ മാത്രമാണ് ഈ ആഘോഷം നടന്നുവരുന്നത്.
പ്രയാഗ് രാജിൽ നടക്കുന്ന കുംഭമേളയിൽ നാല് പ്രധാന സ്‌നാന മുഹൂർത്തങ്ങളിൽ ഒന്ന് വസന്ത പഞ്ചമി ദിവസമാണ്. സരസ്വതി ദേവിക്ക് ഏറെ പ്രാധാന്യം നൽകിക്കൊണ്ടാണ് ആദി ശങ്കരാചാര്യ സ്വാമികൾ കുംഭമേള ചിട്ടപ്പെടുത്തിയിട്ടുള്ളത്. അതിനാൽ അന്നേ ദിവസം തന്ത്രി പ്രതിനിധി നാരായണമംഗലത്ത് ഇല്ലത്തു ബ്രഹ്മശ്രീ. ഗോവിന്ദൻ നമ്പൂതിരിയുടെ നേതൃത്വത്തിൽ മഹാസരസ്വതി പൂജയും വിശേഷാൽ അർച്ചനകളും നടക്കുന്നതായിരിക്കും.
വിദ്യയുടെ അധിദേവതകളായ പ്രഥമ ഗുരു ദക്ഷിണാമൂർത്തിയും, ഗണപതിയും, സരസ്വതിയും സമ്മേളിക്കുന്ന സങ്കേതമായ, നിത്യേന വിദ്യാരംഭം നടത്താൻ സാധിക്കുന്ന ഈ സരസ്വതി ക്ഷേത്രത്തിൽ വിജയദശമി കഴിഞ്ഞാൽ വിദ്യാരംഭം കുറിക്കാനുള്ള ഒരു ശ്രേഷ്ഠദിനം കൂടിയാണ് വസന്ത പഞ്ചമി. മറ്റു സംസ്ഥാനങ്ങളിൽ നിന്നുൾപ്പടെ വരുന്ന നൂറുകണക്കിന് കുട്ടികൾക്ക് വസന്ത പഞ്ചമി പ്രമാണിച്ചു വിദ്യാരംഭത്തിന് പ്രത്യേക സൗകര്യം ഒരുക്കിയിട്ടുണ്ട്.
വിദ്യാരംഭത്തിനു പുറമെ, പുതിയ സംരംഭങ്ങൾക്കും, ചോറൂണിനും ഈ ദിവസം ഉത്തമമായി കണക്കാക്കുന്നു. കുടുംബത്തിൽ സർവൈശ്വര്യം വരുന്നതിനും ദുരിതനിവാരണത്തിനുമായി വസന്ത പഞ്ചമി പൂജയും വ്രതവും അനുഷ്ഠിച്ച് സരസ്വതി ദേവി ഭക്തർ ക്ഷേത്ര ദർശനം നടത്തി വരുന്നു. പുസ്തകങ്ങളും, സംഗീത ഉപകരണങ്ങളും, ചിലങ്കയും വസന്ത പഞ്ചമി ദിനം പൂജിക്കുന്നതിനുള്ള സൗകര്യം ക്ഷേത്രത്തിൽ ഒരുക്കിയിട്ടുണ്ട്.
ദർശനസമയം രാവിലെ 5.00 മുതൽ 11.30 വരെയും വൈകിട്ട് 5.00 മുതൽ രാത്രി 9.00 വരെ യുമാണ്. രാവിലെ 9.30 മുതൽ 11.30 വരെ വിദ്യാരംഭവും ചോറൂണും നടത്തുന്നതിനുള്ള സൗകര്യം ഒരുക്കിയിട്ടുണ്ട്. തന്ത്രി പ്രതിനിധി നാരായണമംഗലത്ത് ഇല്ലത്തു ബ്രഹ്മശ്രീ. ഗോവിന്ദൻ നമ്പൂതിരി ഉൾപ്പടെ അധ്യാപകരും, സംസ്‌കൃത പണ്ഡിത ശ്രേഷ്ഠരും അടങ്ങിയ ആചാര്യന്മാർ ഉണ്ടായിരിക്കും.
വിദ്യാർത്ഥികൾക്കും കലാകാരന്മാർക്കും ഉത്തമമായ സാരസ്വത മന്ത്രം ജപിച്ച സേവിക്കാൻ സാധിക്കുന്ന ആയുർവ്വേദ നെയ്യ് ക്ഷേത്രത്തിൽ ലഭ്യമായിരിക്കും. ഈ ക്ഷേത്രത്തിന്റെ മാത്രം പ്രത്യേകതയായ നാവ്-മണി-നാരായം സമർപ്പണം വിശേഷാലായി ചെയ്യുവാൻ സാധിക്കും. മഹാസരസ്വതി പൂജയിൽ ഭക്തജനങ്ങൾക്ക് ഭാഗവാക്കാകാവുന്നതാണ്.
വസന്ത പഞ്ചമി സംഗീതോത്സവം അരങ്ങേറും. സരസ്വതി ദേവിക്ക് ഏറെ പ്രിയപ്പെട്ട വീണ കച്ചേരിയും, വിവിധ കലാകാരന്മാർ അവതരിപ്പിക്കുന്ന സംഗീത സദസ്സും ഉണ്ടായിരിക്കുന്നതാണ് എന്ന് കേരള ക്ഷേത്ര സേവ ട്രസ്റ്റ്‌ ഭാരവാഹികൾ അറിയിച്ചു.
